Цагдаагийн албан хаагчид хоёр хүнийг хөнөөсөн ноцтой гэмт хэргийг өнгөрсөн оны зургаадугаар сард илрүүлсэн. Хэргийг Чингэлтэй дүүргийн 19 дүгээр хороонд оршин суух хаягтай, 20 настай этгээдийг үйлдсэн болох нь тогтоогдсон юм. Тэрээр зургаадугаар сарын 8-9-нд шилжих шөнө 32 настай З-ийн амь насыг хохироосон бөгөөд мөн сарын 20-21-нд шилжих шөнө 16 настай Д-ийн амь насыг хохироосон болох нь мөрдөн шалгах ажиллагаагаар тогтоогдсон талаар цагдаагийн байгууллагаас мэдээлж байв.
Тус хэргийг үйлдсэн яллагдагч Д-д Нийслэлийн прокурорын газраас хоёр хүнийг алах гэмт хэргийг онц харгис хэрцгийгээр, өөртөө эдийн ашигтай байдал бий болгох зорилгоор, хохирогчийн биеэ хамгаалж чадахгүй болохыг мэдсээр байж алсан, мөн бусдыг заналхийлэх, хулгайлах, залилах, 16 насанд хүрээгүй хүнтэй бэлгийн харьцаанд орох гэмт хэрэгт тус, тус холбогдуулан яллах дүгнэлт үйлдэж ирүүлсэн байна. Гэвч Баянгол, Хан-Уул, Сонгинохайрхан дүүргийн Эрүүгийн хэргийн анхан шатны тойргийн шүүх хоёр хүний амь хохироосон хэрэгт хийгдвэл зохих ажиллагаа хийгдээгүй гэж үзсэн байна.
Тодруулбал, тус хэргийг хохирогчийн хууль ёсны төлөөлөгч, түүний өмгөөлөгч нарын гаргасан хүсэлтийн дагуу шүүхийн урьдчилсан хэлэлцүүлгээр хэлэлцээд:
Уг хэрэгт хийгдвэл зохих ажиллагаануудыг бүрэн гүйцэд хийгээгүй, яллагдагч Д-н эрхийг зөрчиж мөрдөн шалгах ажиллагаа явуулсан зэргээр нотолбол зохих байдлуудыг бүрэн нотлон тогтоож ирүүлээгүй байх тул хохирогчийн өмгөөлөгч нарын мөрдөн шалгах ажиллагааг нэмж хийлгэх хүсэлтийг хүлээн авах шаардлагатай гэж үзсэн байна.
Шүүхээс буцаасан үндэслэлд дурдсан тодорхой мөрдөн шалгах ажиллагаануудыг шүүхийн шатанд нөхөн гүйцэтгэх боломжгүй учраас яллагдагч Д, өсвөр насны яллагдагч Э нарт холбогдох хэргийг Эрүүгийн хэрэг хянан шийдвэрлэх тухай хуульд заасны дагуу Нийслэлийн прокурорын газарт буцааж шийдвэрлэсэн байна.
0 cэтгэгдэлтэй