МҮЭХ-ноос цалин хөлс, хөдөлмөрийн маргаан, ажил хаялт зарласан нөхцөл байдал болон нийгмийн даатгалын багц хууль, ХАБ, эрүүл ахуйн сарын аян, цаг үеийн асуудлаар мэдээлэл хийлээ.Энэ үеэр тус холбооны Ерөнхийлөгч С.Эрдэнэбат:
“МҮЭХ шууд хэлье, хөдөлмөрийн хөлсний доод хэмжээг 880 мянган төгрөгнөөс доошгүй болгож нэмэхийг шаардаж байна. Салбаруудаасаа хамаарч наад зах нь 1’670’000 төгрөг байж байж наад захын амьжиргаагаа хангах нь байна. Засгийн Газрын зүгээс төсөв, мөнгө байхгүй гэх хандлага байдаг. Тэгэхээр одоо суулт, тэмцлийн хэлбэр лүү шилжиж байна. Бид удаан хугацаанд хүлээцтэй хандсан.
Хулгай хийгээд нэг хэсэг нь баяжаад байдаг, хөдөлмөр хийж байгаа нь 500-хан мянган төгрөгөөр амьдарч байна.
Статистикийн хороо бодитой тоо гаргадаг байх хэрэгтэй. Цалинг 1’500’000 болсон гэж зарлаж байна. Сүүлд цалин нэмэхдээ МҮЭХ-той эцэслэн зөвшилцөхгүйгээр нэмсэн. Нэмэхдээ дарга нарынхаа цалинг нэмсэн. Бидний хүүхдийн төлөө өдөр, шөнөгүй ажиллаж байдаг, сургууль, цэцэрлэг, эмнэлэгийн үйлчлэгч, цэвэрлэгч, ажилчдын цалин 8-хан хувиар нэмэгдсэн.
Тэдгээр хүмүүсийн цалинг 15-20 мянган төгрөгөөр нэмэхээсээ ичээч ээ.
Ийм ялгаварлан гадуурхсан цалин нэмэлт байж болохгүй ээ. Ажлаа сайн хийж байгаа бол тэр хүний цалин даргынхаас ч их байж болно. Яагаад манай том, том төрийн өмчит үйлдвэрийн захирал нар энгийн ажилчнаасаа 10 дахин өндөр цалин авдаг юм бэ. Гадаадад, тэр тусмаа төрийн компаниудад бол ийм зүйл байхгүй шүү дээ.
Авлигын хэргээс хураагдсан мөнгийг цалинд зарцуулна гэж Ерөнхий сайд хэлсэн. Одоо энэ амлалтандаа хүрэх шаардлагатай байна.
Монгол улсын төсөвтэй тэнцэх хэмжээний мөнгө далд эдийн засагт эргэлдэж байна. Олон улсын байгууллага үүнийг тогтоосон. Гэтэл цалин нэмэх мөнгө байхгүй ээ гэдэг.
Цалингийн хэмжээгээрээ Монгол улс Азидаа сүүлийн тавд орж байна. Үүнээс болж хүмүүс эх орноосоо дайжиж байна. Ингэхээр бид яаж хөгжил ярих юм бэ?
Солонгост 30 мянган Монгол хүн ажилладаг байсан бол одоо 50 мянга болсон байна. Гэр бүл, ах дүү, найз нөхөд, ангиараа, төгсөлтөөрөө гадагшаа гарч байна. Үүнийг хараад суугаад байх уу.
Тэр бүү хэл эрүүл мэндийн салбараас манай ажилчдад битгий виз дараарай гэсэн асуудал тавьж байсан гэсэн.
Ер нь цалин нэмэх асуудал ярихаар сошиалд зохион байгуулалттай өөр сэдэв гаргаж ирж замхруулдаг.
Мөн цалингийн зээлийн хүүг бууруулах шаардлагатай байна. Тэгэхгүй бол Монголын ард түмэн энэ хэдэн арилжааны банкуудад мөлжүүлж дууслаа шүү. Хэрвээ энэ байдал хэвээр үргэлжлэх аваас бид олон нийтийн тэмцэл, хөдөлгөөнд нэгдэнэ, санаачилна” гэв.
LIKE дарж нэгдээрэй !!!
0 cэтгэгдэлтэй